Мен өз ісімді сүйемін. Небәрі он тоғыз жаста ұстаздық жолды бастағанымда, қандай жемісті әрі қызықты жылдарды өткізетінімнен бейхабар болғанмын. Дипломымды қолыма алып, еңбек жолымды бастағанымда , алдыма әлі асыр салып ойын ойнайтын, сан не, әріп не екенінен беймәлім балалар келді. Зер салып, қарасам бастауыш сынып мұғалімі қалай жазуды, санауды үйретсе, сол тірекпен адам өмір бойы өмір сүреді екен. Ұстаз ретінде, елімнің жастарын сауатты ету – менің жауапкершілігім, менің мамандығым еді.
2011 жылы Нұрсұлтан қаласындағы №67 гимназияға бастауыш сынып мұғалімі болып жұмысқа орналастым.Биыл біздің гимназиямызға 10 жыл толды.
Менің ұстаздық отыз үш жылдығым мен гимназиямыздың он жылдығы сәйкес келген екен. Ең бірінші рет бас қалаға көшіп келгенімде, гимназиямыз да енді ашылып, астанадағы өмірді бірге бастадық. Қиын кезеңдерді де, ең бақытты кезеңдерді де осы қабырғаларда өткіздік. Менің ұстаздық жолыма жаңа бояулар мен жаңа белестер әкелген - гимназия. Осы гимназияның ерекшелігі: ағылшын, неміс, француз, қытай тілдерін тереңдетіп үйретуінде. Ал ұстанымы: «Бақытты бала қаланатын мектеп, әр баладан үміт күту» болса керек. Бұл ұстанымды әрдайым алға тартып, білім мен сену формуласымен жұмыс істеп келемін. Нәтижесінде, менің бірнеше шәкірттерім қалалық сайыстарға қатысып, жүлделі орындарды иеленді. Қалалық 1-7 сынып «Зерде» зерттеу жұмыстары мен шығармашылық жобалар конкурсы, бастауыш сынып оқушылары арасында жылда ұйымдастырылатын қалалық математикалық «Бастау» турнирінде өз оқушыларымның жетістігін көру мен үшін қуаныш.
Еңбек өтілімде қанша жылдар болса да, әлеммен бірге мен жаңарып жатқандаймын. Гимназиямызбен осындай әрдайым жетілу мен жаңа білім үстінде болу - қуаныш, өйткені қандай маман, кәсіпқой болса да, әркім жаңа білімді қажет ететіні айғақ. Себебі, мен адамдардың ғылымға деген ең бірінші жол салушысымын, ең алғашқы ұстазымын. Барлығына оңай көрінетін, жазу мен оқуды үйретуге әлдеқайда үлкен еңбек керек. Осындай үлкен жауапкершілікті арқалап, отыз үш жылда жастар біліміне үлес қосқаным үшін, бір кірпіш дүниеде тетігін тауып қаланғаныма қуаныштымын. Мен мұғалім болғаныммен мақтанамын!
