Кемеңгер Мұхтар Әуезов «Ұстаздық – ұлы іс» деген екен. Мұғалім - мамандық болса, ұстаздық қасиет, табиғат дарытқан құдірет. Егемен еліміздің болашағы, оның әлемдік өркениеттегі өз орны, ең алдымен білім мен тәрбиенің бастауы — ұстаз қолында.
Мен математика пәнінің мұғалімімін. Мен қызмет ететін Сайын ауылындағы «Ғұбайдолла Айдаров атындағы №1 мектеп – лицей» КММ-де үлгі тұтатын ұстаздарым көп. Атап айтсам, Шахимова Тұрдаш, Бекібаева Ғалия, Мусаева Айжан, Төлеміс Раушан, Тоғызбай Ақтілек апайларым. Өзімнің түлеп ұшқан Бейнеу ауданындағы Ақжігіт орта мектебіндегі ұстаздарым Нұрбатырова Мейрамгүл мен Молдабекова Нұржамал апайларымды да ерекше үлгі тұтамын. Бұл ұстаздар жоғары білімді, педагог-зерттеуші мұғалімдер.
Шахимова Тұрдаш – республикалық, облыстық, аудандық сайыстардың жеңімпазы. Сонымен қатар шәкірттерінің де білім бәйгесінде шыңдалуына зор үлес қосып жүрген аяулы ұстаз. ҰБТ – ге дайындаған түлектері 80 %, 90%, 100 % сапа көрсеткіштерін көрсеткен. Білім беру саласындағы еңбектері еленіп, көптеген облыстық, аудандық Алғыс хаттар мен Құрмет грамоталарымен марапатталып жүрген ізденімпаз мұғалім. 2021 жылдың қазан айында өткен Ұстаздар мерекесінде апай облыстық білім басқармасының марапатына ие болды. Қазір Тұрдаш апай зейнеткерлік демалысына шықты. Сол мереке қарсаңында Тұрдаш апайды «Математика және Информатика» бірлестігінің ұстаздары болып құттықтап келдік.
Бекібаева Ғалия аудандық , облыстық сайыстарға қатысып біліктілік курстарынан өтіп, аудан, облыс көлемінде озық іс – тәжірибелерін таратып, оқушылардың білімін жетілдіріп жүруіне ықпал етіп жүрген ұлағатты ұстаз. Оқушылары түрлі сайыстарға қатысып, республикалық, облыстық, аудандық байқаулардың жүлдегерлері атанды. 2021 жылдың қазан айында өткен Ұстаздар мерекесінде Ғалия апай мектебіміздің тұңғыш ҚР Президентінің «Еңбек ардагері » медалінің иегері атанды.
Мен осы мектепке жас маман ретінде мұғалімдік қызметке алғаш келген сәтімде мені жылы шыраймен қарсы алып , маған өздерінің сабақ берудегі тәжірибелерін үйреткен де осы ұстаздар еді. Ұстаздық жолымда осындай мықты , білімді ұстаздармен бірге әріптес болғаныма мақтанамын. Сіздердей Ұлағатты ұстаз болу бізге бұйырсын. Ұстаздарыма үлкен алғыс айта отырып Отбасыларына бақ-береке, амандық, еңбектеріне шығармашылық табыстар тілеймін.
